એમ પણ નથી

દરવાજો ઊઘડ્યો જ નથી, એમ પણ નથી,
ને ઊઘડી ખડ્યો જ નથી,  એમ પણ નથી.

પગ મારો ઊપડ્યો જ નથી, એમ પણ નથી,
ને ખુદ મને નડ્યો જ નથી, એમ પણ નથી.

સાચું પૂછો તો જોયાં છે મેં એને દૂરથી,
પણ એમને અડ્યો જ નથી, એમ પણ નથી.

સામે મળ્યો તો મેં જ મને ઓળખ્યો નહીં,
ખોવાઈ હું જડ્યો જ નથી, એમ પણ નથી.

ઐયાશીમાંય ભાંગી પડ્યો છું ઘણી વખત,
પીધા પછી રડ્યો જ નથી, એમ પણ નથી.

જોયો છે મેં અનેક વાર ઘૂળ ચાટતાં,
પાછો પવન પડ્યો જ નથી, એમ પણ નથી.

“ઘાયલ” જે સાચવે છે મને આમ કેફમાં,
કેફ એમને ચડ્યો જ નથી, એમ પણ નથી.

– અમૃત “ઘાયલ”